هيواد راډيو تلوېزيون هيواد راډيو تلوېزيون
راپور: محمد یار مجروح
وسله والو طالبانو د کندهار د ښوراوک او سپین بولدک تر منځ د سړک جوړوني د شرکت له ۴۴ کارکوونکو څخه ۱۳ تنه د دوشنبې په شپه خوشي کړي دي.
د کندهار د ښوراوک – سپین بولدک د سړک جوړوني شرکت یو کارکوونکی حزب الله وايي، چي دوی د طالبانو سره کومه اړیکه نه وه نیولې او دغه کاریګر د قومي مشرانو په همکارۍ د طالبانو له بنده راخوشي سوي دي.
هغه وايي، د دوی د معلوماتو له مخي کېدای سي وسله وال طالبان نور بندي کاریګر هم ژر خوشي کړي.
خوشي سوي کسان هم د خوشحالۍ په څرګندولو سره وایي، چي د طالبانو له خوا کوم ناوړه چلند نه دی ورسره سوی.
د دوی په خبره، د طالبانو له خوا د پاته کسانو د خوشي کېدو ډاډ هم ورکول سوی دی.
دوی وايي، طالبانو یوه نامعلوم ځای ته بیولي وه او له څو اونیو پلټنو وروسته یې خوشي کړل.
د پاته کسانو د کورنۍ غړي هم له طالبانو څخه د نورو نيول سوو کسانو د خوشي کېدو غوښتنه کوي.
چارواکو مخکي ویلي وه چي طالبانو دغه کارکوونکي د ډیورنډ کرښې هاغاړي ته د ګلستان په سیمه کي ساتل.
خپله وسله والو طالبانو د خوشي سوو کسانو په اړه تر اوسه څه نه دي ویلي.