هيواد راډيو تلوېزيون هيواد راډيو تلوېزيون
په ۲۰۵ اتل قول اردو کي د ملکي او نظامي ډاکټرانو له خوا سيمینار جوړ سو، چي هدف يې د روغتیا په برخه کي لا ښه پرمختګ او ناروغانو ښه تداوي کول دي.
په دغه سيمینار کي د ۲۰۵ اتل قول اردو قوماندان برید جنرال ارکانحرب میر اسدالله کوهستاني و ویل، د افغان ځواکونو په لیکو کي ډاکټران او روغتیايي کارکوونکي هغه کسان دي، چي هم د افغان ځواکونو او هم د ملکي کسانو ژوند ژغوري.
هغه وویل، ملکي او نظامي ډاکټران په کندهار او نورو جنوبي ولایتونو کي په همږغۍ د جګړې د ټپیانو درملنه کوي او هڅه کوي چي لا یې هم په کار کي ښه والی راسي.
دغه راز د ۲۰۵ اتل قول اردو د روغتون قوماندان او نورو ډاکټرانو هم د روغتیايي خدماتو اړوند خبري وکړې او په روغتیايي برخه کي د ښه خدماتو په موخه يې خپل نظریات سره شریک کړل.
دوی وویل، دغه ډول سمینارونه ډېر ګټور دي او ډاکټران کولای سي یو د بل سره خپلي تجربې شریکي کړي تر څو د نظاميانو او ملکیانو لپاره په عاجلو او عادي حالاتو کي ښه خدمات وړاندي کړي او د هغوی ژوند وژغوري.
دغه راز په دې سمینار کي هغه ډاکټرانو ته تقدیرنامې هم ورکړل سوې چي په خپلو دندو کي یې ښه وړتیا ښوولې وه.