هيواد راډيو تلوېزيون هيواد راډيو تلوېزيون
رپوټ: خالد همت
په کندهار ښار او یوولس ولسواليو کي د پوليو څلور ورځني کمپاین پیل سو، چي په دې ځانګړي کمپاین کي به ټولټال ۴۴۲۲۸۸ د هدف وړ ماشومانوته ګوزڼ ضد څاڅکي تطبیق کړي.
د کندهار د عامي روغتیا سرپرست رئیس موسی جان سلطاني وایي، په کندهار ښار او ۱۱ ولسوالیو کي به دا کمپاین د څلورو ورځو له پاره وي او دوی غواړي له تېر کمپاین څخه پاته کوچنیان چي یو لک و نهه دېرش زره کیږي، هم دا ځل د پوليو پرضد وقایه کړي.
په جنوب کي د پولیو پر ضد د بېړنیو اقداماتو رئیس ډاکټر عبدالقیوم پخلا وایي، کندهار ښار د پوليو د وايروس د انتقال مرکزیت ګرځېدلی دئ.
دی زیاتوي، د جنوب د نورو برخو په ګډون په شمال لوېدیځ بادغیس کي هم د پوليو د وایروس تړاو د کندهار له ویروس سره دی چي دا له طبي پلوه د اندېښنې وړ مسئله ده.
د ډاکتر
پخلا په وینا، چي لاهم د کندهار په ځینو برخو کي کور په کور واکسین لپاره په نا
امنه ولسوالیو کي شرایط برابر نه دي.
بلخوا عام خلک وایي، د پولیو
د ضرر په هکله اوس پوهه سوي او غواړي چي خپل کوچنیان د یادي ناروغۍ پر وړاندي
وقایه کړي.
دوی وايي، چي په کلي کي يې د پوليو د پېښي له رامنځته کېدو سره زیاتره کورنۍ اوس د خپلو کوچنیانو وقايې ته ډېره پاملرنه کوي.
سږکال په افغانستان کي د پوليو ټولي ۲۱ مثبتي پېښې رامنځته سوي چي ۱۶ يې دجنوب په درو ولایتونو کندهار، روزګان او هلمند، ۳ په ختیځ او وروستی پېښه هم په بادغیس کي ثبت سوې ده.
روغتیايي مسئولین غوښتنه لري چي د واکسین د ټيمونو په ورتګ سره دي کورنۍ د واکسین پر وړاندي مبارزه کي خپله مسئولیت ادا کړي.