هيواد راډيو تلوېزيون هيواد راډيو تلوېزيون
په کندهار کي ځايي خبریالان وايي چي د کندهار امنیه قومندان تیره شپه د هغه پایې ایستلي دي چي پاکستان غوښتل اغزن سیم ورباندې وغځوي.
د راپورونو له مخي پاکستاني عسکرو غوښتل د کندهار ولایت د سپین بولدک او ښوراوک ولسوالیو ترمنځ د سرو څاهانو په سیمه کي اغزن سیم تیر کړي.
افغان سرتیرو د پاکستاني عسکرو ددې کار مخنیوی کړی دی.
ددې کار په مقابل کي پاکستاني عسکرو افغان ځواکونو د جګړې خبرداری ورکړی، خو افغان سرتیرو یې پروا نه ده کړې او ددوی د کار مخنیوی یې کړی دی.
د کندهار امنیه قومندان جنرال رازق هم امر کړی، چي د پاکستاني عسکرو له لوري جوړي سوي پایې باید ژر تر ژره و ایستل سي.
پاکستاني عسکرو په سیمه کي ځايي امنیتي او دفاعي ځواکونو ته د خبرو وړاندیز کړی دی، خو دوی یې وړاندیز نه دی منلی او ویلي یې دي، چي دوی ته به په سیمه کي د اغزن سیم د غځولو اجازه ور نه کړي.
پاکستان له څو میاشتو راهیسي پر ډیورنډ فرضي کرښه د اغزن سیم د غځولو چاري پيل کړي دي، چي افغان حکومت غیر قانوني بللي دي او دغه خط یې غیر رسمي او نا منل سوي پوله بللې ده.