هيواد راډيو تلوېزيون هيواد راډيو تلوېزيون
د سوداګرۍ او صنايعو وزارت ويلي چي د نورو هيوادونو او افغانستان ترمنځ د دهلېزونو پرانيستلو په لړ کي نن د کابل او شارجې هوايي دهلېز هم پرانيستل سو.
د ياد وزارت له لوري په رالېږل سوې خبرپاڼه کي راغلي، چي د ياد دهلېز په لومړۍ الوتنه کي نن څه باندي ۲ ټنه زردالو او تازه الو شارجې ته ولېږدول سول.
دغه راز په خبرپاڼه کي راغلي چي له دې مخکي د افغانستان، هند، قزاقستان، ترکيې، عربستان او اروپا ترمنځ هوايي دهلېزونه فعاله سوي دي.
د سرچينې معلوماتو پر بنسټ، د هوايي دهلېزونو پرانيستني له پيله تر اوسه څه باندې ۷ زره ټنه توکي د ۶۳۰ الوتنو په ترڅ کي د نړۍ بېلابېلو هيوادونو ته صادر سوي دي.
د ياد وزارت چارواکو د معلوماتو له مخي، د افغانستان او ځينو هيوادونو ترمنځ د هوايي دهلېزونو له پيل څخه وړاندي د افغانستان صادراتو اصلي مسير پاکستان وو؛ خو ډېر ځله د افغانستان او پاکستان ترمنځ د ترينګلو اړيکو له امله افغان سوداګر له ستونزو سره مخ کېدل، نو ځکه دا ستونزه لامل سوه، چي افغان چارواکي له نورو هيوادونو سره هوايي دهلېزونه پرانيزي.