هيواد راډيو تلوېزيون هيواد راډيو تلوېزيون
د سولي ولسي حرکت غړي وايي چي وسله والو طالبانو په هلمند کي د دغه حرکت څلور مهم غړي له ځان سره بېولي دي.
په دې اړه د هلمند په مرکز لښګرګاه کي د سولي ولسي حرکت مرکزي غړي باچا خان مولاداد ویلي، چي د تېري پنجشنبې په ورځ د دغه حرکت يو شمېر غړو د وسله والو طالبانو تر واک لاندي ولسوالۍ موسى کلا ته پلى سفر پيل کړ.
ده وويل چي د حرکت غړي پرون ناوخته موسى کلا ته رسېدلي او لس پنځلس کيلومتره چي مخته تللي، له طالبانو سره مخ سوي دي.
د نوموړي د معلوماتو له مخي، په بيول سوو کسانو کي د سولي ولسي حرکت مشر محمد اقبال خيبر، د دغه حرکت وياند بسم الله وطن دوست، د هلمند د هستې مشر غلام سرور غفاري او د ننګرهار د هستې مشر حاجي فرهاد عادل شامل دي.
وسله والو طالبانو تر اوسه په دې اړه څه نه دي ويلي.
د يادوني ده، د سولي ولسي حرکت پروسږ کال د هلمند په مرکز لښکرګاه کي پيل سو، چي بيا د دغه حرکت غړو پلى کابل او ځينو نورو ولايتونو ته سفرونه وکړل او موخه يې په هیواد کي د سولي راتګ دئ.