هيواد راډيو تلوېزيون هيواد راډيو تلوېزيون
راپور: عبدالمنان ارغند
د کندهار د عامي روغتیا ریس ډاکتر عبدالقیوم پخلا وایي، د روان کال په اوږدو کي په کندهار کي ټولټال د پولیو ۷ مثبتي پیښي ثبت سوي چي ۵ پیښي په شاولیکوټ ولسوالۍ کي یوه په سپین بولدک ولسوالۍ او یوه هم د کندهار ښار په لویه ویاله سیمه کي رامنځته سوې ده.
پخلا وایي، شاولیکوټ ، میانشین ، نېش او خاکریز د کندهار هغه ولسوالۍ دي چي د ډیري مودې راهیسي وسله والو مخالفینو او د سیمو خلکو د پولیو ضد واکسین په کمپاین بندیز لګولی وو خو وروسته له ډيرو هڅو په دي وروستیو کي دوی د ټولو موافقه ترلاسه کړې او ټولو ولسوالیو کي یې کمپاین ته زمینه برابره کړې ده.
د کندهار د عامي روغتیا رئیس له ښکېلو غاړو او ددي ولایت د ټولو اوسېدونکو څخه غواړي ترڅو د پولیو ضد واکسین د پروګرام سره همکاري وکړي او د دغه ویروس په ګډه سره له منځه یوسي.
دا په داسی حال کي ده چي د روان کال په اوږدو کي د هیواد په کچه د پولیو دیارلس مثبتي پیښي ثبت سوي چي اووه یې د کندهار، دوې د هلمند او یوه مثبته پیښه هم د روزګان ده.
مسؤلین وایي، ددغه مثبتي پېښو لامل د کوچنیانو خراب تغذي حالت، ناپاکي اوبه، ناامني او په لویه کي پاکستان هیواد ته تګ راتګ ګڼل کیږي.