هيواد راډيو تلوېزيون هيواد راډيو تلوېزيون
راپور: محمد یار مجروح
د کندهار ولایتي مسؤلین وايي، دنوی کال لپاره یې امنیتي تدابیر نیولي دي.
خو ددغه ښار اوسېدونکي بیا وروستیو امنیتي پیښو اندېښمن کړي او له مسؤلینو څخه د بشپړ امنیت نیولو په برخه کي د جدي اقدام غوښتنه کوي.
د کندهار اوسېدونکي وايي، په ښار کي غلچکي بریدونه او بمي چادوني زیاتي سوي او همدارنګه له عامو خلګو څخه غوښتنه کوي چي د امنیتي پيښو په مخنیوي کي له حکومت سره همکاري وکړي او پر وخت امنیتي ځواکونو ته خبر ورکړي.
په ورته وخت کي د کندهار والي وايي، د ښه امنیت لپاره يې پر ښاري ګارنېزون جوړلو کار پيل کړی دی.
حیات الله حیات وايي، د امنیت د لاښه کنټرول لپاره د ملي اردو، ملي پولیسو او ملي امنیت ځواکونو ګډ ښاري ګارنېزون جوړوي چي په هغو سیمو کي به عملیات کوي چیري چي وسلوال تهدیدونه موجود وي.
دی وايي، د ولسوالیو د امنیت لپاره هم پر خاصو امنیتي تدابیرو کار کوي.
د کندهار والي همدارنګه زیاتوي چي د نوی کال لپاره يې بشپړ امنیتي تدابیر نیولي او ښاریان کولای سي په ډاډه زړه میله ځایونو ته ولاړ سي.
دده په خبره ، امنیتي ځواکونو ته یې خاصه سپارښتنه کړې تر څو د وسلوالو پيښو د تکرار د مخنیوي لپاره کلک امنیتي تدابیر ونیسي.