هيواد راډيو تلوېزيون هيواد راډيو تلوېزيون
راپور: محمد یار مجروح
د افغان ترک لیسې د زده کوونکو والدینو په کندهار کي د یو مطبوعاتي کنفرانس پر مهال وویل، چي د افغانستان نظام دي د یو بامسٔوولیته مرکزي نظام په توګه د خلګو له حقونو څخه دفاع وکړي او د خلګو څخه دي د انتخاب حق نه اخلي.
دغه کسانو وویل، چي افغانان نړیوالو بشري مرستو ته اړتیا لري او افغان ترک لیسې باید د سیاست قرباني نه سي.
داسي راپورونه سته چي پدي ورستیو کي به د ترکيې دولت استازي کابل ته راسي او په افغانستان کي به ټولي افغان – ترک لیسې وتړي.
پدې اړه د زده کوونکو والیدینو وايي، چي افغان دولت دي د زده کوونکو سرنوشت ته پام وکړي او افغان ترک لیسې دي د سیاست نه قربانوي.
پر همدې مهال د چارو شنونکي او د پوهني وزارت پخوانی معین ډاکټر غلام جیلاني همایون پدې نظر دی، چي افغان ترک لیسو په افغانستان کي د اساسي قانون په منلو سره په فعالیت پيل کړی دی او له هر ډول حقوقو څخه برخمني دي.
دی وايي، ترکانو په سختو حالاتو کي د افغانستان سره همکاري کړې او د علم او فرهنګ په ډګر کي يې افغانستان ته په نړیواله سطحه لاسته راوړني راوړي او افغان دولت ورباندي افتخار کوي.
د ده په خبره افغان دولت ته په کار ده چي د دغو ښوونځیو د مشرتابه بدلون ته اجازه ور نه کړی، ځکه دا چاره به د دغو ښوونځیو پر ښوونیز بهیر ناوړه اغېزه وکړي.
په ترکیه کې یو کال مخکي د ناکامي کودتا تر هڅي وروسته د ترکیې حکومت فتح الله ګولن په کودتا کي په لاس لرلو تورن کړ او له افغان دولته يې وغوښتل چي په یاد هیواد کي د افغان – ترک لیسې وتړي.
له ترکیې څخه د باندي ترک لېسې د ناراضه ترک روحاني فتح الله گولن له لورې تمویل او پرمخ بیول کیږي.
په افغانستان کې لومړنی افغان-ترک ښوونځی په ۱۹۹۵ کال کې پرانستل سو او اوس یې شمیر ۱۶ ته رسیدلی دی چي پکښي شاوخوا ۸۵۰۰ زده کوونکي زده کړه کوي.