هيواد راډيو تلوېزيون هيواد راډيو تلوېزيون
راپور: محمد یار مجروح
کندهاري خبریالان د هیواد راډیوتلویزون د پخواني خبریال رفیع الله غورځنګ د فاتحې او د قرانکریم د ختم لپاره راټول سوي او د هغه روح ته دعاګاني کوي.
رفیع الله غورځنګ تیره اوونۍ د کابل په یوه روغتون کي ساه ورکړه.
د خدای بخښلي رفیع لله غورځنګ ورور وحیدلله علیزی وايي، دوی له چا سره کومه شخصي ستونزه نلري، خو زیاتوي چي د غورځنګ وظیفوي رقابت د هغه د مړیني سبب ګرځیدلی دی.
دی له حکومته غواړي تر څو د خبریالانو خوندیتوب ته پام وکړي.
بل خوا په کندهار کي د خبریالانو د خوندیتوب کمیټه او پریس کلب ۲۰۱۸ کال د خبریالانو په وړاندي خونړی کال یادوي.
د دوی په خبره حکومت هغه وعدې نه دي پوره کړي چي ګواکي د خبریالانو ژوند ته به پوره پام کوي.
په جنوب کي د طلوع نیوز خبریال عبدالله همیم وايي، خبریال باید د کار په ساحه کي ځان ساتني ته پام وکړي.
د ده په خبره خبریال باید هغه ساحه وپيژني چيري چي د رسنیو لپاره خبر چمتو کوي.
ارواښاد رفیع الله غورځنګ شاوخوا ۷ کاله په هیواد تلویزیون او هیواد راډيو کي د ورزشي خبرونو خبریال، پروډیوسر او ۲ کاله مخکي د هیواد تلویزیون د نشراتو د مسٔول په توګه دنده درلوده.
خدای بخښلي رفیع الله غورځنګ په دې وروستیو کي د ولسي تړون په نوم پروګرام کي د فوټوګرافر په توګه دنده درلوده چي، تیره اوونۍ يې د کابل په یوه روغتون کي ساه ورکړه.
د هغه د مرګ لامل لا تر اوس څرګند نه دی.