هيواد راډيو تلوېزيون هيواد راډيو تلوېزيون
رپوټ: حکمت الله واقب
که څه هم ډېر خلګ غواړي د نورستان د ښکلاګانو ننداره وکړي، خو دغه ولایت ته له کونړ څخه تللي لار، ۱۰۰ کیلو متره خامه ده چي د سفر له پاره څوک زړه نه ورته ښه کوي.
دولت نورستان ولایت ته د تللي لاري د پخولو له پاره هغه وخت خپلي هڅي لا پسي چټکي کړې، چي یاد ولایت د افغانستان د درېیم ملي پارک په نامه و نومول سو.
د کونړ – نورستان د لویي لاري د لومړۍ برخي د پخولو کار پروسږ پیل سوی وو او د دوهمي برخي دا یې پرون پیل سو.
د نورستان اوسېدونکي او په ملي شورا کي د دغه ولایت استازي وایي، دا چي نورستان د ملي پارک له غوښتنو سره سم برابر سي نو د یادي لاري د پاتي برخو د پخولو کار هم باید پیل سي.
په ورته مهال د کونړ – نورستان د لاري موټروانان وایي، پر خامه او ستونزمنه لار سفر کولو ستړي کړي دي، د دوی په خبره که یاده لاره پخه سي نو یاد ولایت ته به سفر کول آسانه سي او ګڼ سیلانیان به نورستان ته سفرونه پیل کړي.
د افغانستان د درېیم ملي پارک په توګه د نورستان له نومول کېدو وروسته د نورستانیانو په ګډون د ډېرو هيوادوالو هیلي ډيري سوي دي، چي یاد ولایت ته به د بیارغوني په برخه کي پاملرنه ډېره سي او نورستان به د ملي پارک د غوښتنو سره سم جوړ سي.