هيواد راډيو تلوېزيون هيواد راډيو تلوېزيون
محمد یار مجروح
که څه هم په کندهار کي د نوي کال مراسم نور وختونه د خاکریز ولسوالۍ په شاه اغا زیات کي ترسره کیږي خو د امنیتي ستونزو له امله د نوي کال مراسم دا ځل د ارغنداب ولسوالۍ په باباولی زیارت کي تر سره سوه.
د کندهار ولایتي مسٔوولین وايي، امنیتي ځواکونو پوره هڅي کړي خو د تپل سوي جګړې له امله دولت ندی توانیدلی تر څو د خلګو هغه هیلي ورپوره کړي چي د تیر کال په شروع کي يې درلودې.
د کندهار والي زلمي ویسا د نوي کال د مراسمو د لمانځلو پر مهال وویل، چي تیر ۱۳۹۶م کال د کندهار لپاره د لاس ته راوړونو ډک کال وو او په راتلونکي کال کي به هم په دغه ولایت کي په زیاته اندازه انکشافي کارونه ترسره سي.
هغه د تیر کال د لاس ته راوړنو څخه د ټاپي پروژې یادونه وکړه چي د کندهار له شپږو ولسوالیو څخه به تیریږي او په زرګونو کسانو ته به د کار زمینه پکښي برابره سي.
کندهار والي د همدا راز وویل، چي په ۱۳۹۷م کال کي به په کندهار کي زیات پرمختیايي کارونه ترسره سي.
هغه زیاته کړه چي په روان کال کي به د کندهار د دهلې دبند د لوړیدو چاري ترسره سي چي د کندهار اووه ولسوالۍ به ورڅخه خړوبه سي.
د هغه په خبره د برېښنا په برخه کي به هم یو لړ تغیرات راسي.
پر همدې مهال د ارغنداب ولسوال شاه محمد محمدي او د اطلاعاتو کلتور ریٔس فضل الباري بریالی د نوی کال د مراسمو پر مهال وویل، چي په روان کال کي باید د سولي په برخه کي زیاتي هڅي وسي او د دولت څخه مررو وروڼه پخلا سي.
دوی زیاته کړه، چي د هیواد د ابادلو لپاره باید خپله ټول افغانان لاس په کار سي او بهرنیو کړیو ته اجازه ورنکړي چي په افغانستان کي تخریبي فعالیتونه ترسره کړي.
په افغانستان کي د نوي کال او نوروز ورځي په لمړي ځل د یما باچا له لوري لمانځل سوي.
که څه هم افغان دولت ۱۳۹۶م کال د افغانانو لپاره د لاس ته راونو ډک کال بولي خو روانو جګړو په دغه هیواد کي تیر کال په زرګونو کسان ووژل او په زیاته شمیر يې ټپيان کړل.