هيواد راډيو تلوېزيون هيواد راډيو تلوېزيون
د هرات ولایت د نشه يې توکو په وړاندي د مبارزي مدیریت پولیس وایي، سږکال یې نیږدي ۴۰ ټنه مختلفه نوعه مخدره توکي تر نیولو ورسته سوځلي، خو د دي ولایت د ولایتی شورا مشر بیا د پولیسو له لوري د مخدره توکو د سوځولو پروسه غیرشفافه او غیرقانوني بولي او وایي، معلومه نه ده چی نیول سوي توکي په بشپړ ډول سوځل کیږی.
دا خبری په داسي حال کي کیږي چي د دي ولایت امنیتی ځواکونو د مخدره توکو یو لوی موټر چي ایران هیواد ته قاچاقیدی نیولي ده.
دا موټر چي د مرمر ډبري یې ایران هیواد ته لیږدولي د هرات ولایت د پولیسو له لوري تر پلټني ورسته ورڅخه ۱۳۰ کیلو ګرامه کریستال ډوله مخدره توکي لاسته راغلي چي د پولیسو په خبره په ډیر ماهرانه ډوله د ډبرو په منځ کي ځای پر ځای سوی وه.
د هرات ولایت د امنیت آمر امین الله امین: (( د دي مخدره توکو د قاچاق په تور یې د دي موټر چلوونکی نیولی او د نورو شریکان د نیولو لپاره یې هڅي پیل کړي دي.
د هرات ولایت د مخدره موادو په وړاندي د مبارزي مدیر حمیدالله نصرت نصرت زاده وایي، د روان کال د پيل څخه تر اوسه یې تر ۴۰ ټنه ډیر مختلفه نوع مخدره توکي چی ګران بیه تیزاب هم پکښي شامل وه نیولي او ښوځولي یې دي.
ښاغلی نصرت زاده وایي، د یادو مخدره توکو د قاچاق په تور یې ۳۳۶ کسان چي څلور یې ایرانیان وه هم نیولي چي عدلي او قضایې ارګانونو ته سپارل سوي دي.
د هرات ولایت د ولایتی شورا مشر کامران علیزایی بیا د پولیسو له لوري د مخدره توکو د لمنځه وړلو پروسه غیرقانونی او غیر شفافه بولي او وایي معلومه نه ده چی نیول سوی مخدره توکي سوځول کیږي او که پرځاۍ یې نور توکو ته ور اچول کیږی.