هيواد راډيو تلوېزيون هيواد راډيو تلوېزيون
راپور: اجمل وصال
د روزګان په روانه جګړه کي د وژل سوو سرتیرو د کورنیو غړي پر ښکلیو خواو ږغ کوي، چي جګړه پای ته ورسوي او د بې ګناه افغانانو وژنه ودروي.
دوی چي د کورنۍ غړي یې ددغه ولایت د پولیسو په لیکو کي دلاسه ورکړي له طالبانو غواړي له جګړې لاس واخلي.
امنیتې مسٔوولین بیا وایي، د تیرکال په پرتله توانیدلي په جګړه کي د پولیس د مرګ ژوبلي شمیر کم کړي.
دغه لسګونه کسان د هغو پولیس سرتیرو د کورنیو وارثین دي، چي د تیر یوه کال راهیسي د روزګان په مرکز او ولسوالیو کي د پولیسو په لیکو کي یې ژوند د لاسه ورکړی.
دوی چي د وژل سوو پولیس سرتیرو د اکرامې پیسو ترلاسه کولو لپاره امنیې قومندانۍ ته راغلي پر وسله والو طالبانو ږغ کوي چي روانه جګړه ودروې او د سولي له بهیر سره یوځای سي.
د روزګان امنیه قومندان مل پاسوال رحمت الله صدیقي وایي، څه باندي اته میلیونه افغاني نن د هغو پولیس سرتیرو د کورنۍ غړو ته ورکول سوې چې ددوی سره یې په جګړه کې قرباني ورکړي دې.
امنیه قومندان وایي، د تیرکال په پرتله د پولیسو د مرګ ژوبلي شمیر کم سوی او لامل یې په مسلکي توګه د پولیسو روزنه او په مجهزو وسایلو سمبالول دي.
په اروزګان کي نه یوازي د تیرو دوکلونو راهیسي تر ۷۰۰ زیاتو پولیس سرتیرو ته د جګړې پرمهال مرک ژوبله اوښتي، بلکي ددغه ولایت عامو اوسیدونکو ته هم جګړې دروند زیان اړولی او دشمیرو له مخي تر ۱۳ زره زیاتي کورنۍ بې ځایه سوي دي.