په تېره جولای میاشت کي (۱۵۰۰) افغان ملکیان وژل سوي دي

په افغانستان کي د ملګرو ملتونو سیاسي استازولۍ یا ‘یوناما’ په خپل تازه خپاره کړي راپور کي ویلي چي یوازي د روان کال په جولای میاشت کي ۱۵۰۰ افغان ملکیان وژل سوي او ټپیان دي.
یوناما وايي، د روان ۲۰۱۹ کال له پیله او د ۲۰۱۷ کال له مې میاشتي را وروسته په تیرو څه باندي ۲ کلونو کي دا د ملکي مرګ ژوبلي تر ټولو خونړۍ میاشت وه، چي لامل یې د حکومت ضد عناصرو بریدونه ښودل سوي.
د افغانستان له پاره د ملګري ملتونو ځانګړي استازي تدامیچي یاماموتو ویلي: څرنګه چي په دې وروستیو اونیو کي د سولي هڅي ګړندۍ سوي مځکنۍ جګړه هم ورسره تېزه سوې ده.
یوناما په دې خپل راپور کي چي په پرتله ییز ډول یې خپور کړی په ښاري سیمو کي د طالب وسله والو بریدونو ته اشاره کړې، چي پر امنیتي ځواکونو سوي.
یوناما په خپل دې راپور کي د حکومت ضد جنګي ډلو له خوا پر وژل سوو ملکیانو ژوره خواشیني ښودلې، چي د سړک غاړي ماینونو په چاودنو کي وژل سوي او ټپیان سوي.
په رپوټ کي د سړک غاړي ماینونو د چاودنو له کبله د څه باندي ۵۰ سلني ولسي مرګ ژوبلې مسئولیت پر حکومت ضد ډلو اچول سوی.