هيواد راډيو تلوېزيون هيواد راډيو تلوېزيون
راپور: مهتمم صالح
د کندهار په ولايتي شورا کي د يوې غونډي پر مهال د ولايتي شورا رئيس حاجي سيدجان خاکرېزوال وويل، کندهار ولايت ډېر زورېدلی دی، که کوم والي ورته ټاکل کيږي، بايد د ولسونو سره په مشوره وټاکل سي.
خاکرېزوال وايي، عبدالحنان منيب په سختو حالاتو کي کندهار د بهران څخه ژغورلی دی او غوښتنه کوي، چي عبدالحنان منيب د کندهار د رسمي والي په توګه معرفي کړل سي.
دغه راز د کندهار ولایت قومي مشران وايي، که ولسمشر غواړي چي کندهار ته نوی والي وټاکي اول باید د ستر جنرال عبدالرازق قضیه په دقیقه توګه وڅېړل سي او ولس ته دي د قناعت وړ دلایل وړاندي سي.
دوی زياتوي، کندهاريان هر وخت د نظام تر شاه درېدلي دي او د ولسمشر پرېکړو ته احترام لري، خو ولسمشر هم بايد د دوی غوښتني ومني او د نوي والي تر ټاکل کیدو مخکي دي د ولایت مقام د پيښي په اړه دوی پوره قانع کوونکي معلومات ورکړي او د دغه قضيې اصلي عاملین دي ونیسي.
دغه قومي مشران په داسي حال کي یادي څرګندوني کوي چي د کندهار لپاره نوی والي حیات الله حیات ټاکل سوی خو تر اوسه معلومه نه ده چي کله به په رسمي ډول معرفي سي.
پر ټولیزو رسنیو هم زیات شمېر کسانو د کندهار د والي په توګه د حیات الله حیات له ټاکلو سره مخالفت څرګند کړی.