هيواد راډيو تلوېزيون هيواد راډيو تلوېزيون
راپور: مهتمم صالح
په کندهار کي د کوچنيانو د حقوقو څخه د دفاع په موخه غونډه جوړه سوه چي، پر مهال یې د افغانستان د کار او ټولنيزو چارو وزارت استازي فضل باري شمسي، غونډي ګډونوالو ته وويل، په راتلونکي لمريز کال به د هيواد په پنځو زونونو کي د کوچنيانو د حمايې مرکزونه جوړ کړي.
شمسي وايي، اوس مهال په افغانستان کي د کوچنيانو د حمايوي۳۰ مرکزونه سته، چي په دولت پوري اړه نه لري او د لنډمهال لپاره دي.
شمسي وايي، د دغه مرکزونو اولنی په کابل کي جوړ سوی دی.
د کندهار د بشري حقونو خپلواک کمېسيون رئيس فخرالدين فایض وايي، په دغه ولايت کي ډېری کوچنيان په شاقه کارونو بوخت دي.
دی وايي، دغه شاقه کارونه درې لاملونه لري چي د ځای او ډوډۍ، د کورنۍ د سرپرست نه شتون او د کورنۍ د مشرانو د خوا شاقه کارونو ته د کوچنيانو مجبورول دي.
بل خوا د کندهار اوسېدونکي له دولت څخه غوښتنه کوي، چي په دغه ولایت کي بې سرپرسته کوچنیانو ته د ځای او تعلم زمينه برابره کړي.
دوی وايي، دغه کوچنيان په بېلابيل ستونزو اخته سوي او د کورنۍ د يوې ګولې ډوډۍ د پیداکولو لپاره د هيڅ کار څخه ډډه نه کوي.
په کندهار کي زیات کوچنيان د سپلنيو دودولو، مستريخانو، له کثاپاتو څخه د پلاستکانو ټولو او د خښتو له بټيو څخه د ماښام يوه ګوله ډوډۍ برابروي.