هيواد راډيو تلوېزيون هيواد راډيو تلوېزيون
د ولسي جرګې د څه باندي سلو غړو د لاسلیکونو په راټولو سره د جرګې د رئيس له پاره له سره انتخابات غوښتي دي.
د جرګې ۱۰۲ غړو د ځینو پاڼو په لاسلیک کولو سره غوښتي، چي د ولسي جرګې د رئيس له پاره دي بیا انتخابات وسي.
مریم سما د جرګې له هغو غړو ده چي دغه لاسلیکونه یې راټول کړي دي.
دا وايي، د یوې جنجالي رایي له پاره سري یا علني انتخابات غیر قانوني دي او د نوو څېرو ترمنځ باید بیا انتخابات له سره وسي.
که څه هم شا و خوا ۴۰ ورځي دمخه د ولسي جرګې د رئیس ټاکلو له پاره تر انتخاباتو وروسته د جرګې موقت رئيس میر رحمان رحماني ګټونکی اعلان کړ، خو کمال ناصر اصولي او پلویان یې وايي، رحماني ۱۲۳ رایي خپلي کړي او د پنځوس جمع یو پر اساس چي ۱۲۴ کيږي، هغه یې نه دي خپلي کړي.
دغه اختلاف د تېري چهارشنبې په ورځ د جرګې د غړو ترمنځ په فزیکي نښتو واوښت، چي د یو شمېر وکیلانو له خوا د جرګې د ریاست مېز او چوکۍ پکښي ماتي سوې.
کمال ناصر اصولي د شنبې په ورځ خبریالانو ته وویل، دا چي ده او میر رحمان رحماني دواړو پنځوس جمع یو رایي نه دي وړي، دغه انتخابات باید باطل اعلان سي.