هيواد راډيو تلوېزيون هيواد راډيو تلوېزيون
راپور: نثار احمد څپاند
په کلات ښار کي د کرکټ د معیاري لوبغالي د جوړیدو چاری شاوخوا یو کال وړاندي پيل سوې چي د مسٔوولینو په خبره د نشه یي توکیو پر وړاندي د مبارزې د وزارت له خوا به اوه لکه ډالر پر ولګول سي.
خو اوس ویل کیږي په هغه سیمه کي چي د دغه میدان د جوړولو کار روان دی د مرکزي دولت لخوا د شنې ساحي په توګه پيژندل سوې او د کرکټ میدان د کار د بندیدو غوښتنه سوې ده.
د زابل والی خیال محمد حسینی چي له سیمي یې لیدنه کوله وویل، چي دا ډول ستونزي د کار په نیمايي کي د منلو نه دي او باید چي مرکزی دولت او هغه ادارې چي د کار د بندیدو خبره کوي بیرته د لوبغالی جوړیدو ته اجازه ورکړي.
نوموړي وویل، چي د زابل اوسیدونکي د ورزش مینه وال دي او د دغه میدان جوړیدو ته ډیر خوشاله و او دوي په جدي ډول هڅه کوي چی ژر دغه ستونزه هواره کړي او پر خپل وخت د کرکټ میدان جوړ سی
د زابل ولایت یو شمیر اوسیدونکي هم وایي، چي باید مرکزي دولت او ولایتي اداره په ګډه هڅه وکړي چي موجودي ستونزي هواري سي او د پروژې کار پر خپل وخت پای ته ورسیږي ځکه اوس هم ډير وخت په وتلی دی.
دوی وایی، که دغه میدان جوړ سي د ځوانانو لپاره به د تفریح او ورزش ځای وی او پر ټولنه به ډير مثبت تاثیرات ولری.
په زابل کی د کرکټ د میدان پر وړاندي په داسي حال کي ستونزی را پورته سوي دي چي تردې مخکي د هوايي ډګر او نوی سل بستریز روغتون کارونه هم د ورته لاملونو له مخي ځنډول سوي دي چي له امله یې خلګ مایوسه او پر دولت بې باوره سوي دي.