هيواد راډيو تلوېزيون هيواد راډيو تلوېزيون
د خېمي ګډونوالو له حکومت څخه وغوښتل چي په هیواد کي دې د بهرنیو لاس وهنو مخه ونیسي او د سولي بهیر دي لا چټک کړي.
د میوند ولسوالۍ څخه مخکي تیره ورځ په کندهار ښار کي هم د هلمند په ملاتړ د پرلت خیمه درول سوې وه.
د کندهار ځوانانو د هلمند په لښکرګاه ښار کي د هغې خيمې د درېدو په ملاتړ خېمه پرانیستل، چي په هیواد کي يې د سولي په نیت درولې.
دې ته ورته د کندهار په لرغوني او تاریخي ولسوالی میوند کي هم د سولي د ولسي حرکت په ملاتړ خیمه ودرول سوه.
د کندهار ښار د سولي په نیت په دې درول سوې خېمه کي د جګړې قربانیان او د جګړې د قربانیانو ماشومان هم ناست وه.
پرلت کوونکي خبرداری ورکوي که د افغان جګړې ښکیلي خواوي د سولي په تړاو د ولس غوښتنو ته جواب ونه وایي، نو پر وړاندي به یې ودرېږي.
د دوی په وینا، چي د سولي لپاره دي اقدامات په رښتيني ډول بدرګه سي، نه د پروژې او ګټو لپاره.
پر همدې مهال د کندهار په لرغوني او تاریخي ولسوالۍ میوند کي هم نن یکشنبه د سولي غوښتني خېمه ودرول سوه او د میوند پرلتوالو له حکومت څخه غوښتنه وکړه، چي د هغو بهرنیو لاسوهنو مخنيوی دي وکړي، چي د سولي پر وړاندي خنډ دی.
هغوی د سولي دا حرکت اوږدمهاله وباله او ډاډ یې څرګند، چي د سولي تر مذاکراتو به د سولي د پرلتونو او خېمو دا لړۍ د هېواد ټولو سيمو ته ورسوي.
د سولي ولسي حرکت چي له هلمند څخه پیل سو دا مهال د هیواد به د مختلفو ولایتونو کي دا ډول خېمي درول سوي او له جګړه مارو غواړي چی هر څومره ژر کیږي سوله دي وکړي او دلته دي جګړه ختمه کړي.