هيواد راډيو تلوېزيون هيواد راډيو تلوېزيون
رپوټ: مهتمم صالح
په کندهار د عاشورا د ورځي په مناسبت د کندهار اهل تشيع د امام حسين د ويني بانک ته ۱۳۵ زره سي سي وينه ورکړه.
د کندهار د عامي روغتیا رئیس ډاکټر عبدالقیوم پخلا وايي، ډېر کسان غواړي چي وينه ورکړي، خو د امکاناتو د کمښت له امله نه سي کولای چي له ټولو څخه وینه واخلي، ځکه ښايي دغه وينه مصرف نه سي او له دوی څخه خرابه سي.
ډاکټر پخلا وايي، د دوی د نن ورځي هدف درې سوه کسان وه، چي د هر کس څخه ۴۵۰ سي سي وینه کاږي.
د پخلا په خبره دغه وينه به دوی ته يوه مياشت بسنه وکړي او په ميرویس روغتون کي به د ويني د کمښت مخه ونيسي.
بلخوا وينه ورکوونکي وايي، دوی دغه وینه د ثواب په نيت ورکوي او غواړي چي په ياده وينه د خپلو هیوادوالو ژوند وژغوري.
دوی وايي، چي علماء يې پر دې ټنګار کوي، چي بايد وينه بې ځايه مصرف نه کړي بلکي د ويني بانک ته يې وسپاري.
دوی د ټولو هيوادوالو څخه غوښتنه کوي، چي د ويني له بانکونو سره مرسته وکړي.
د شعيه مذهب پیروان د عاشورا په ورځ مذهبي مراسم نیسي، چي ډېر وخت په دغه مراسمو کي د پېښمانۍ په خاطر خپل ځانونه وهي، چي له امله یې د خپل بدن ډېره وينه ضايع کوي.