هيواد راډيو تلوېزيون هيواد راډيو تلوېزيون
رپوټ: مهتمم صالح
د کندهار په ولسوالیو کي رواني جګړې ورځ تر بلي زور اخلي او د خلګو هغه اميدواري، چي د سولي پروسې ته يې لرل، له منځه وړي.
دلته په کندهار کي خلګ جګړو اندېښمن کړي دي او وايي، چي يادو جګړو د کندهار اوسېدونکي له ډېرو ستونزو سره مخ کړي دي.
دوی وايي، داخلي بې اتفاقۍ د دې لامل سوي دي، چي جګړې شدت پیدا کړي، چي له امله يې ډېر عام کسان ټپيان او وژل سوي دي.
دغه کسان زیاتوي، چي د جګړو له امله هره ورځ سلګونه کورني بې ځايه کېږي، چي په یخه هوا کي له سختو ستونزو سره لاس او ګرېوان کيږي.
د دوی په وينا له یوې خوا جګړې له خلګو هر څه اخلي، له بلي خوا بیا په ښار کي د کورونو مالکان له بې ځايه سوو سره ظلم کوي او کورونه پر ګرانوي.
دوی له ښاریانو وغوښتل، چي د جګړو له امله د بې ځايه سوو لاس نيوی وکړي او کورونه په مناسب قيمت ورکړي.
د کندهار په ارغنداب، ژېړۍ او پنجوايي ولسواليو کي جګړې زیاتي سوي دي او هره ورځ يې د جګړو خبرونه خپريږي.
څه وخت مخکي امنيتي ځواکونو خبر ورکړ، چی ارغنداب ولسوالي د وسلوالو له شتون پاکه کړه، خو تيري دوې ورځي يو ځل بیا په دغه ولسوالۍ جګړو زور اخيستي او زياتي سيمي يې وسلوالو طالبانو نيولي دي.