هيواد راډيو تلوېزيون هيواد راډيو تلوېزيون
رپوټ: محمد یار مجروح
کانګو یا وینه بهېوونکې تبه یوه وایروسي وژونکې ناروغي ده، چي د څارویو د ذبحي پر مهال او یا هم له مکروبي وینو څخه د انسان بدن ته داخلیږي.
د کندهار د روغتیا مسئولین وايي، که څه هم د کانګو مثبتي پېښي ډېري کمي دي خو د لوی اختر په ورځو کي یې دخپرېدو خطر ډېر دئ.
د عامي روغتیا ریاست د ساري ناروغیو مسئول ډاکټر محمدیعقوب نصرت وايي، کندهار د اهلي حیواناتو د انتقال لویه لار ده، چي د کانګو ناروغۍ د خپرېدو چانس پکښي دېر دئ او که خلګ د څارویو د حلالېدو پر مهال پام و نه کړي، کېدلای سي ډېر کسان باندي اخته سي.
شدیده تبه، د سر او عضلاتو درد، د سترګو سوروالی، له رڼا څخه ویره، زړه بدوالی، کانګي، د نس درد او ځیني نور د کانګو ناروغۍ نښي نښانې دي، چي د ډاکټرانو په وینا که يې تداوي ژر و نه سي، د مرګ خطر ورسره تړلی دئ.
دی زیاتوي که په کوم کس کي د یادي ناروغۍ نښي نښانې ولیدل سي، باید ژر تر ژره روغتون ته مراجعه وکړي.
کانګو ناروغي هر کال په افغانستان کي لسګونه کسان وژني.
د عامي روغتیا وزارت وايي، تر اوسه لا د کانګو ناروغۍ د مخنیوي له پاره واکسین نه دئ جوړ سوی، خو د احتیاطي تدابیرو په نیولو سره يې مخنیوی اسانه دئ.