هيواد راډيو تلوېزيون هيواد راډيو تلوېزيون
د کوزي پښتونخوا ملتپال عوامي نیشنل ګوند وايي چي د سولي په خبرو کي د افغان حکومت له نظره غورځول به لويه تیروتنه وي.
دغه څرګندوني د دغه ګوند مرکزي غړي او د اطلاعاتو او فرهنګ مسٔوول ميا افتخار حسين پرون په پیښور پوهنتون کي د باچا خان مرکز له خوا د افغان سولي په اړه يوه سيمينار ته کړې دي.
هغه په ډاګه کړې چي د افغان حکومت له ګډون پرته د سولي خبري به هېڅکله بريالۍ نه سي.
نوموړی دغه څرګندوني په داسي حال کي کوي چي د امريکا او طالبانو ترمنځ د سولي نېغ په نېغه خبري رواني دي او ويل کیږي چي د اماراتو په ناسته کي طالبانو د افغان حکومت له پلاوي سره له ليدو انکار کړى و.
ميا افتخار حسين ويلي چي له افغان حکومت پرته د سولي خبري پر مخ وړل به د پخوانيو ناکامو تجربو تکرار وي.
هغه د پاکستان پر حکومت نيوکه کړې چي هېڅکله يې خپلواکه او بې پري بهرنۍ تګلاره نه لرله او ټينګار يې کړی چي خپلواکه بهرنۍ تګلاره د پاکستان او ګاونډيانو په ګټه ده.نوموړي افغان سولې ته په اشارې سره ويلي، دا خبرې هغه مهال بريالۍ کېداى شي چې اړوند خواوې رښتيني وي.