هيواد راډيو تلوېزيون هيواد راډيو تلوېزيون
په افغانستان کي د ملګرو ملتونو د بشري مرستو د همږغۍ ادارې د سې شنبي په ورځ په یو راپور کي وویل، وروستیو سیلابونو په ټول افغانستان کي شاوخوا ۶۳ کسان وژلي او ۳۱ نور یې ټپیان کړي دي.د ملګرو ملتونو د بشري مرستو د همغږۍ دفتر یا «OCHA» په خپل راپور کي زیاته کړې چي په کندهار او هرات ولایتونو کي د سیلابونو له کبله خلکو ته د اوښتو زیانونو ارزونه پای ته رسیدلي او په فراه، هلمند، کونړ، لغمان، ننګرهار او زابل کي چیري چي د راپور په وینا ۵۲ زره کسان بشري مرستو ته اړتیا لري ارزونه روانه ده.
د ملګرو ملتونو دې راپور کي وړاندي ویل سوي چي په کندهار کي تر ۳۲ زرو زیات او په هلمند کي بیا تر ۱۸ زرو زیات سیلاب ځپلي بشري مرستو ته اړتیا لري.
د ملګرو ملتونو دا راپور زیاتوي، په اتو ولایتونو فراه، کندهار، هلمند، هرات، کاپیسا، پروان، زابل او کابل کې وروستیو سیلابونو ۴۸۷۴ کورونه هم ویجاړ کړي او تر اووه نیم زرو زیات نور یې زیانمن کړي دي.
راپورونه وايي چي د دوشنبي په ورځ سخت بارانونه په هرات کي د تازه سیلابونو سبب سوي چي په څو ولسوالیو کي یې تر ۱۵ زیات کسان وژلي دي.
د ملګرو ملتونو د بشري مرستو د همغږۍ اداره وايي، له افغان حکومت او نورو مرستندویه ادارو سره په ګډه هڅه کوي چي د افغانستان په بېلابېلو سیمو کي سیلاب ځپلو ته عاجلې بشري مرستې ورسوي.