هيواد راډيو تلوېزيون هيواد راډيو تلوېزيون
راپور: محمد یار مجروح
کندهار والي او امنیتي مسٔوولین د ټاکنو لپاره د پوره امنیت ډاډ ورکوي او په دې برخه کې د خلکو همکاري هم مهمه بولي.
په کندهار ولایت مقام کې د ټاکنو په اړه د یوې غونډي په ترڅ کي کندهار والي زلمي ویسا وویل، ټاکني د ډيموکراسۍ اصل دی او باید خلک د خپلي خوښي نوماند ته د رايي ورکولو لپاره په ټاکنو کې پراخ ګډون وکړي.
هغه وویل، د ټاکنو لپاره امنیت نیول سوی خو خلک هم باید د دې ملي پروسې د ښه ترسره کېدو لپاره په دې برخه کې همکاري وکړي.
د ټاکنيزو شکايتونو د کمېسيون عمومي رئيس عبدالعزيز اريايي په دغه غونډه کې وویل، دوی په هر ولایت کې درې تنه د شکایاتو کمېسیون غړي لري چې ټاکنیز شکایتونه به ثبتوي.
هغه وویل، د ټاکنو په ورځ نوماندان باید له هر ډول درغلۍ څخه ډډه وکړي تر څو ولس په خپله خوښه رایه ورکړي.
ده وویل، د بایومیټریک سیسټم په اړه مسلکي کسان روزل سوي او دا کار د ټاکنو د لا ښه شفافیت لپاره ترسره سوی دی.
د پولیسو د ۴۰۴ زون قوماندان عبدالنبي الهام وویل، په دغه زون کې امنیت په پوره ډول نیول سوی او خلک په ډاډه زړه کولای سي چې رایه ورکړي.
ده وویل، د ټولو امنیتي ادارو سره په ګډه یې پلانونه جوړ کړي تر څو دغه ملي پروسه پرته له کومې پيښي تر سره سي.
د راتلونکې شنبې ورځ چي د تلې اته ویشتمه نېټه ده د ولسي جرګې د ټاکنو ورځ ده او په کندهار کې به خلک په ۱۷۳ مرکزونو کي نوماندانو ته رایي ورکړي.